BBVA propón unha fusión por absorción de Banco Sabadell cun troco dunha acción de nova emisión de BBVA por cada 4,83 accións de Banco Sabadell, o que supón unha prima de 30%, asumindo que non se realizarían reparticións de dividendos, reservas ou calquera outras distribucións por parte de ningunha das sociedades aos seus respectivos accionistas.
O banco comunicou esta terza feira á Comisión Nacional do Mercado de Valores (CNMV) a proposta enviada ao Consello de Administración do Sabadell na que recolle a oferta da potencial operación de fusión entre ambas as entidades.
A entidade resultante tería unha das súas sedes operativas en Catalunya e o Sabadell contaría con tres conselleiros, un deles vicepresidente. A denominación social e marca serían as de BBVA, aínda que se podería manter a utilización de marca Banco Sabadell.
En canto a posíbeis axustes de persoal, a entidade indica que "na integración dúas persoais respectaríanse en todo caso os principios de competencia profesional e mérito, sen a adopción de medidas traumáticas".
BBVA e Sabadell tentan de novo unha fusión que naufragou en 2020 e que agora podería xerar un xigante bancario con máis dun billón en activos, 41.000 empregados e empregadas no Estado e ao redor de 18 millóns de persoas usuarias.
Segundo grupo bancario na Galiza
A integración de BBVA e Sabadell pasaría a ser o segundo maior grupo bancario na Galiza, só por detrás de Abanca (que ten 435 sucursais). O número de traballadores e traballadoras que suman entre as dúas entidades financeiras que agora avalían a súa unión supera lixeiramente os 1.000, en concreto, 1.084.
A nova entidade contaría non conxunto do territorio galego cun total de 182 oficinas, superando así as ao redor de 150 que posúen Santander e Caixabank no país. Destas 182 oficinas, o Sabadell achegaría 65, mentres que BBVA dispón das outras 118.