Máis alá do sexo: un achegamento ás primeiras veces, a masturbación e o desexo

Para falar de sexualidade o primeiro que hai que facer é entender o concepto e como isto forma parte da vida das persoas. No que concordan tanto a divulgadora Laura Veiga, creadora da plataforma Pingando.gal, como a psicosexóloga Martina González e a sexóloga Noelia Moreau, traballadoras do centro de sexoloxía compostelán Con Mucho Gusto!, é en que a exploración corporal é habitual desde a infancia e a curiosidade e as preguntas son o máis natural. Aínda así, Laura ten presente que a adolescencia é un momento no que as amizades adoitan converterse no punto de referencia; levando isto en ocasións a presións de grupo que, en palabras da divulgadora, “ás veces poden traducirse na preocupación de facer as cousas ben ou mal”. Unha idea contra a que intenta loitar porque, ao final, “a cada persoa vaille gustar unha cousa distinta e non existe un libro de instrucións para as relacións sexo-afectivas”. Pola súa parte, Purificación Leal, sexóloga e presidenta de Sogasex, argumenta a amplitude do concepto de sexualidade, entendendo que abrangue “dimensións que van desde os cromosomas sexuais até ás corporalidades, as identidades sexuais, o erotismo, os afectos, as relacións, a reprodución...”. Aínda así, non se pode obviar que a construción da sexualidade é algo que varía en función da etapa da vida, das crenzas, das experiencias... Co cal, o que queda claro é que “hai tantas sexualidades como persoas”. Javi Sánchez (Meiga-i): "Na música tradicional hai sexualidade, hai homoerotismo e hai de todo" Un manual de instrucións Cómpre por tanto entender que a sexualidade non se limita ás relacións sexuais e, para loitar contra os prexuízos existentes, Martina González considera que “é imprescindíbel unha educación sexual integral”. De feito, incide en que moitas persoas non saben nomear a vulva, diferenciar entre vaxina e uretra ou explicar por onde menstrúan. Por iso, a autoexploración resulta crucial para xerar unha imaxe mental do corpo e, de feito, este autocoñecemento pode ser clave para, en palabras da psicosexóloga, “expresar o que gusta, o que non e pór límites”. Laura Veiga concorda, malia que engade que aínda existen prexuízos arredor da masturbación, asegurando que “semella que é algo que só é parte da túa vida cando non tes parella”. Porén, a divulgadora entende que “igual que estamos concienciadas de que cando tes unha relación non deixas de lado as túas amizades ou os teus hobbys, tampouco podes deixar as atencións cara a ti mesma”. Purificación Leal engade que existen estudos que demostran que aínda custa falar de autoerotismo e esta falta de referentes pode levar a certo sentimento de culpa. Igualmente, Noelia Moreau sinala que “ás veces parece que a masturbación é algo case obrigatorio e isto fai sentir mal as persoas que non o fan”, matizando con isto que hai moitas formas de vivir a sexualidade. De feito, Laura Veiga destaca que semella que “o mundo está tan sexualizado que parece que todas as persoas teñen que ter relacións sexuais ou non van ser felices e isto non é así.” Aínda que aproveita para destacar que a rapazada dos centros de ensino identifica conceptos como os de asexualidade ou demisexualidade. Sexualidade animada e en feminino, así é a nova curta que reivindica o pracer das mulleres Con todo, queda moito que aprender. Así, Laura concreta que “ás veces a xente aínda se sorprende ao descubrir que as infeccións de transmisión sexual poden pasarse dos xenitais á boca” e entende que existe aínda moito descoñecemento, remarcando que cuestións como gardar os preservativos coas chaves ou abrilos cos dentes pode facer que rompan. Desde Con Mucho Gusto! inciden en que “na vida hai moitas primeiras veces e nin é obrigatorio nin ten que doer”. Non se pode esquecer que hai diferentes formas de manter relacións sexuais e todas son válidas. Como salientan, “a virxindade é un mito e é natural perder a erección, ter nervios, non chegar ao orgasmo, bloquearse, suar, querer parar ou que se che escape un gas”. Na procura dunha mellor educación sexual, Veiga ve fundamental “ter unha persoa de confianza que sirva como referente para falar sobre estes temas”. En consonancia con isto, Leal avoga pola necesidade de “derrubar o tabú e traballar as emocións que nos impidan falar con transparencia e de maneira positiva sobre sexualidade”. Igualmente importante é, indican González e Moreau, aprender a facerse preguntas, a identificar os sentimentos e a construír unha identidade sexual dun modo libre e sen prexuízos. Nove de cada dez adolescentes consomen pornografía: así inflúe na formación de actitudes sexistas Cámara e luces: a pornografía como ficción Ante todas as dúbidas que suscita a sexualidade, Noelia Moreau entende que a pornografía se consolida como “o método de busca de información”, mais non se debe esquecer que non deixa de ser unha ficción na que se gravan varias tomas, na que se escolle a luz… propiciando con isto expectativas pouco realistas. Con todo, Martina considera que “o porno mainstream funciona porque encaixa co que aprendemos que é o sexo e os estereotipos dos roles de xénero”, reclamando a responsabilidade de educar en sexualidade. Unha responsabilidade que tamén reivindican desde Sogasex, aínda que Purificación Leal engade que nin sequera é necesario buscar contidos pornográficos, porque son estes os que atopan ás persoas, incidindo na súa abundancia.

Máis alá do sexo: un achegamento ás primeiras veces, a masturbación e o desexo

Fóra do estigma: visibilizar e falar de saúde mental fronte aos tabús e aos prexuízos