O presidente croata, Zoran Milanovic, encargou a sexta feira ao primeiro ministro, o conservador Andrej Plenkovic, a formación de Goberno, ratificándoo no cargo logo de que presentara as sinaturas de apoio de 78 dos 151 escanos do lexislativo.
Para garantirse a maioría absoluta no seu terceiro mandato e tras a diminución da súa representación nas eleccións do 17 de abril, a Unión Democrática Croata (HDZ) rubricou un acordo de coalición co Movemento da Patria (DP), de extrema dereita, que xestionará os Ministerios de Economía, Agricultura e Demografía. Plenkovic tamén recibiu o apoio da metade da representación das minorías e dunha deputada da conservadora Ponte.
O DP sostivo que sacará o país da Convención de Istambul contra a violencia machista, cuestionou o dereito ao aborto, atacou as persoas migrantes ou exixiu a fin do financiamento público, por medio dun programa orientado ás minorías, de Novosti, un semanario publicado polo organismo que representa a minoría serbia e que ao tempo é unha das publicacións máis respectadas do país.
