O Partido Nacional Escocés (SNP) designou a segunda feira John Swinney como novo líder após esgotarse o prazo de presentación de candidaturas sen que se rexistraran máis militantes, polo que non serán precisas votacións.
A prensa local prevé que a terza feira sexa ratificado polo Parlamento Escocés como novo primeiro ministro, substituíndo en ambos os dous cargos Humza Yousaf, que dimitiu a pasada semana ante unha posíbel derrota nas mocións de censura en contra súa e do seu Executivo derivadas da ruptura do acordo de Goberno entre o SNP e os Verdes, que garantía a maioría absoluta da Cámara.
Swinney volverá dirixir unha formación que xa liderou entre 2000 e 2004, ademais de desempeñarse como viceprimeiro ministro de Escocia entre 2014 e 2023, con Nicola Sturgeon como primeira ministra.
A súa elección, que semellaba asegurada a pasada semana cando Kate Forbes, que perdeu as votacións internas o pasado ano contra Yousaf por apenas catro puntos, descartou presentarse e anunciou que o apoiaría, foi cuestionada a fin de semana por Graeme McCormick, que milita na formación nacionalista desde hai máis de tres décadas.
McCormick, que sostivo que logrou as sinaturas necesarias para participar nas primarias, informou á última hora de que tras unha “larga e frutífera conversa” resolveu apoiar Swinney.
“O punto central da miña mensaxe é que temos que unirnos”, defendeu o novo líder, que admitiu que “tivemos un par de anos difíciles” e “moitas tensións en torno a un par de cuestións no Parlamento”.
Corrupción
Todo isto entre acusacións de corrupción contra a formación, que levaron á detención de Sturgeon e da súa parella, Peter Murrell, ex director executivo do SNP.
