Momento histórico para acabar coa desigualdade en saúde

O Ministerio de Función Pública negocia a renovación do concerto coas mutualidades de persoal funcionario para 2025. Resulta chocante que esta prestación sanitaria non sexa negociada polo Ministerio de Sanidade, xestionado por Mónica García, de Sumar, que aposta pola súa desaparición, senón polo de Función Pública, en mans do partido socialista, proclive a mantelo para satisfacer a presión das empresas privadas. A renovación e mellora económica deste concerto implica perpetuar a situación de fraccionamento da atención da saúde e unha discriminación flagrante que favorece a unha parte do funcionariado: Muface (ensino, gobernos locais, policía, parlamentarios…), Mugeju (persoal ao servizo da xustiza e Isfas (forzas armadas), que vulnera a equidade en saúde. As aseguradoras privadas fan trampa Un recente estudo compara os ingresos de funcionarios en hospitais públicos cos da poboación xeral, focalizándoo nos diagnósticos de cancro (enfermidade de alto custo e que ten unha prevalencia similar entre os empregados públicos e o resto da poboación). Así, a probabilidade de ter un cancro metastásico é un 31% maior nos funcionarios hospitalizados en centros públicos que no resto da poboación. Isto proba as denuncias de que as mutuas de funcionarios "seleccionan riscos", é dicir envían á pública os pacientes con enfermidades de elevado custo de tratamento. Problemas graves de saúde Aínda que Muface privilexia os empregados públicos cun acceso máis rápido á asistencia, probas diagnosticas ou con estancias hospitalarias máis cómodas, tamén discrimina o persoal funcionario que padece afeccións máis graves, como o cancro, ao que envía a hospitais públicos atrasando así o seu tratamento. Estas compañías privadas buscan os empregados públicos sans e rexeita os enfermos que precisan tratamentos custosos. Cando un funcionario é diagnosticado dunha enfermidade grave como o cancro as mutuas preténdeno convencer de que a calidade dos seus recursos non é boa xa que carecen de tecnoloxías avanzadas, teñen listas de espera longas ou dunha calidade da atención baixa se a patoloxía é complicada. Apostan pola sanidade pública Esta circunstancia fai que moito persoal funcionario cambie á sanidade pública. En 2010 un 13,9% do persoal funcionario asegurado e dos seus familiares optaba pola prestación pública, mentres que en 2021, esa porcentaxe ascendeu a 20%. Elixiu a sanidade privada 75% do colectivo de Muface, 79% de Mugeju e o 91% de Isfas. En total, perto de 1,73 millóns de persoas, aínda que o volume das primas ascendeu a 1.626 millóns de euros. As mutuas pagan mal Moitas delas pagan moi pouco ao persoal subcontratado, ás veces case a perdas, dado que o colectivo médico debe pagar pola súa conta os gastos de persoal, luz, locais de consulta, etc. o que os obriga a incrementar o numero de pacientes. No canto de ver a dous pacientes en media hora atenden dez nunha hora, o que supón unha perda de calidade e de seguridade da asistencia. As aseguradoras (Adeslas, Asisa e DKV) pagan ao persoal médico un 80% menos que na sanidade pública polos mesmos servizos e esas tarifas están conxeladas desde hai anos. As mutuas carecen de persoal médico propio, actuando só como xestoras. Toman o diñeiro e buscan no mercado sanitario privado o prestador máis barato chegando a pagar 9 euros por paciente atendido en medicina xeral ou 18 na especialidade, cando na sanidade pública se pagan 60 euros en medicina xeral e entre 80 e 100 na especializada. Agora, as mutuas teñen listas de espera con mais de catro días en atención urxente ou catro meses para especialidades hospitalarias. Unha situación inaceptable Acabar con Muface, Mugeju e Isfas de súpeto sería imposible porque xeraría o caos, de entrada, dado que non se poden crear novos recursos públicos en pouco tempo. Mais si podería aplicarse de forma progresiva, facendo que o persoal funcionario de novo ingreso non se integre no modelo de mutuas e se vaian reducindo os fondos destinados a estes concertos para investilos en sanidade pública, o que melloraría os servizos, permitiría contrata máis persoal sanitario, facer máis hospitais, abrir novos consultorios... As aseguradoras pagan ao persoal médico un 80% menos que na sanidade pública polos mesmos servizos Debemos presionar para evitar que a sanidade privada consiga xeneralizar o modelo mutualista a toda a poboación alegando que é mais eficiente e ten menores custos. É unha falacia que non se corresponde coa realidade: é máis cara e ofrecer peores prestacións.