Un total de 928 actuacións, vistas, comparecencias e audiencias previas foron suspendidas nos 276 órganos xudiciais de toda Galiza desde o inicio da folga da quenda de oficio o pasado 21 de novembro. Isto supón unha media de nove actos cada día. O dato ofreceuno esta cuarta feira o director xeral de Xustiza da Xunta, José Tronchoni, na Comisión Primeira, Institucional, de Administración Xeral, Xustiza e Interior do Parlamento galego, na que deu resposta a unha pregunta formulada polo nacionalista Iago Tabarés, quen emprazou o Goberno do PP a sentar a negociar cos avogados de oficio que levan cinco meses en folga.
Na súa intervención, na que asegurou "respectar" pero "non compartir" a decisión de folga, Tronchoni detallou que 76% das suspensións producíronse na xurisdición penal, o 24% na civil, un 4% na social e un 1% na do contencioso administrativo. Por circunscricións, o 39% das actuacións xudiciais suspendidas corresponden á da Coruña, 35% á de Ourense, 16% á de Pontevedra e 10% á de Lugo.
O director xeral gabouse demanter diversas reunións en 2023 e 2024 cos profesionais en folga para abordar cuestións como o incremento das partidas en materia da quenda de oficio, a inclusión de conceptos novos e seguir asignando convenios de colaboración naquelas materias que a lei non cobre.
Destes encontros, así como das conversas cos decanos dos colexios de avogados, dixo que saíron "diversos acordos" en beneficio do colectivo como a actualización e inclusión de novos conceptos no baremo de indemnizacións ou a redución da tramitación no pagamento da representación e defensa das persoas insolventes que non teñen recoñecido o servizo de dereito de xustiza gratuíta.
A maiores incluirase no baremo de indemnizacións conceptos como a intervención letrada en entradas e rexistros domiciliarios, o proceso concursal e procesos de especial complexidade en todas as ordes. Tamén se prevé unha revisión de todas as cantidades do baremo.
O director xeral dixo que Galiza é unha das comunidades cos baremos máis elevados e das máis áxiles no seu pagamento, e que estabelece o incremento das compensacións fixadas conforme ao IPC a partir de xaneiro de 2024. Ademais, dixo que Galiza é unha das poucas que incorporou a defensa e representación de persoas xurídicas nos procesos penais, así como o acompañamento inicial ás vítimas de especial vulnerabilidade.
Segundo indicou, desde 2010 a Xunta destinou á asistencia xurídica gratuíta máis de 167 millóns, con incrementos en todos os conceptos ao longo do período. En canto ao mantemento da infraestrutura do servizo de asistencia xurídica gratuíta e da quenda oficio, José Tronchoni apuntou que só en 2023 supuxo un investimento superior aos 876.000 euros, un 7% máis que no ano anterior.
Críticas do BNG
Pola súa parte, o deputado e portavoz de Xustiza do BNG, Iago Tabarés, reclamou ao Goberno do PP que sente a negociar cos representantes da avogacía e dos procuradores que levan máis de cinco meses en folga, e reivindicou a dignificación e mellora do servizo de xustiza gratuíta e da quenda de oficio.
"A xestión desta situación xa é peor que a de 2018, cando a folga de funcionarios durou catro meses", denunciou o deputado, que advertiu das consecuencias que o paro ten no funcionamento da xustiza galega. Ademais, reclamou á Xunta máis orzamento para atender á xustiza, ao asegurar que Galiza é das comunidades que menos invisten por habitante neste ámbito.
