A tempada de pesca fluvial arrinca este domingo na Galiza, tras a apertura dos períodos hábiles para capturar troitas e carpas, aínda que para outras especies, como os salmóns, este período iniciarase o 1 de maio.
Esta actividade poderase practicar no período comprendido entre unha hora antes de que saia o sol e unha hora despois de que se poña.
Con carácter xeral, serán hábiles todos os días para pescar en ríos e encoros fóra das segundas feiras, salvo os que sexan festivos estatais ou autonómicos. Iso si, as quintas feiras só serán hábiles para a modalidade de pesca sen morte -tamén fóra dos festivos-.
Tallas mínimas
A normativa autonómica fixa as cotas de captura e as tallas mínimas que deben ter os peixes. Por exemplo, as troitas -que inauguran a tempada- deben medir, como mínimo, 19 centímetros, aínda que os límites poden ser de 21, 23 ou 25 centímetros en función do lugar de captura. Tamén depende do lugar a cifra máxima de exemplares que se poden pescar, situada entre tres e seis.
Período hábil
O período hábil para a pesca fluvial irá até o 30 de setembro nos cotos de pesca intensiva e nos tramos sen morte, mentres que nos cotos con convenio, con carácter xeral a tempada prolongarase até a mesma data na modalidade sen morte.
A Galiza contabiliza un total de 132 cotos de pesca. Xunto a estes, hai outros 141 tramos fluviais identificados para practicar a pesca sen morte.
