Agora Repúblicas: BNG, ERC, Bildu e Ara Més asinan o acordo de coalición para as europeas e defenden o seu legado

O presidente de ERC, Oriol Junqueras; o cabeza de lista de EH Bildu ao Parlamento Europeo, Pernando Barrena; o responsábel de Relacións Internacionais da Executiva do BNG, Rubén Cela, e mais o coordinador de Ara Més, Mateu Mates, asinaron esta quinta feira en Barcelona o acordo da coalición Agora Repúblicas para concorrer ás eleccións europeas e reivindicaron o traballo feito nesta última lexislatura.

Nun acto conducido pola eurodeputada e cabeza de lista de ERC aos comicios, Diana Riba, as organizacións asinantes celebraron que se reedite a candidatura coa que xa concorreran aos comicios en 2019, obtendo tres escanos, e que este ano sexa "máis potente e ambiciosa" coa incorporación dos baleares de Ara Més. "É unha candidatura que pretende volver traballar polas nacións sen Estado e para alcanzar un Estado propio e construír estas sociedades máis xustas, igualitarias e sustentábeis", destacou Riba. Ao BNG, desta volta, correspóndelle o terceiro posto na papeleta, e non o quinto, como nas anteriores eleccións.

Así, explicou que nesta lexislatura queren seguir debatendo o dereito á autodeterminación en Europa, algo que considera que xa fixeron nestes últimos cinco anos ao presentarse "unha lei de claridade comunitaria que debe axudar a resolver os conflitos de soberanía dentro da UE". Tamén queren defender as súas respectivas linguas nas institucións europeas "ante o nacionalismo español dentro do Comité de Peticións", así como impulsar a súa oficialidade e convertelas en linguas de traballo na Eurocámara.

En materia de violencias machistas, Riba reivindicou conseguir pór sobre a mesa unha directiva sobre esta cuestión, así como "unha lexislación europea que traballe para protexer as e os xornalistas e todas as activistas ante as demandas 'mordaza' que cada vez máis gobernos e grandes empresas queren utilizar para silenciar disidencias".

A eurodeputada de ERC, ademais, celebrou lograr a creación dunha comisión de investigación sobre Pegasus e que o informe puxese "ao mesmo nivel o Estado español que países como Hungría e Polonia no uso destas tecnoloxías". A pesar de admitir que non o conseguiron todo, asegurou que no ámbito da defensa do sector primario ou a relativa a políticas fiscais atopáronse moi sós.

"Os partidos do réxime do e as dereitas votaron en contra dos agricultores e a favor de vellas receitas austericidas que só benefician os de sempre, os privilexiados", dixo. Por iso, chamou á participación nas eleccións porque, ao seu xuízo, hai moito en xogo para manter Europa "como un espazo de dereitos e liberdades que dea resposta ás diferentes crises, como a social, económica e ecolóxica, e sobre todo a democrática".

Rubén Cela: "O escano do BNG estará ao servizo de todo un país"

"Para nós esta foi unha coalición moi útil hai cinco anos, que garantiu un gran traballo en defensa dos nosos respectivos pobos", enxalzou o galego Rubén Cela, que tamén celebrou que Ara Més vaia este ano tamén na papeleta canda as formacións soberanistas galega, vasca e catalá, e argumentou que, aínda que pertencen a territorios distintos, teñen "moitos valores e principios políticos importantes" en común.

Defendeu que Agora Repúblicas é "unha coalición ampla, plural, aberta, transformadora e de avance social" que porá o foco na defensa da democracia, as liberdades e os dereitos colectivos dos pobos e das persoas. "Garantiremos que o escano do BNG non será só o escano dunha organización política, senón un escano ao servizo de todo un país, como o foi ao longo destes anos cun inxente traballo por parte da nosa compañeira Ana Miranda", concluíu.