Matrimonio entre política e economía: a propósito de Altri

A política económica propiciada pola dereita liberal caracterízase por defender o liberalismo a ultranza e a non intervención do Estado, para practicar xusto o contrario segundo as comenencias do capital orgánico do que é xestor. A pauta é sempre contribuír de forma neta ao medre do capital, do capital conveniente. No noso país coñecemos algo diso. Cando se trata do devir de sectores de industria propria faise alusión ás forzas do mercado e cando se tratar de grande industria enerxética, ou de gran capital foráneo (tamén de comenencia), até se perden as formas para apoialo. O asunto de Altri e o Goberno galego transitan por esa senda de comenencia de intereses dunha parte do gran capital. Non é confusión entre goberno e capital, é comenencia ou mesmo traspaso do tabú da independencia necesaria entre goberno e empresas: entre público e privado. Unha pasteira na Ulloa O caso máis recente, paradigma desa actuación prohibida no manual do liberalismo, é a actuación proactiva do Goberno galego a respeito de Altri, de tal forma que, despois de declaralo proxecto tractor, pasou a ter o papel de ÚNICO. A pasteira afecta negativamente a toda Galiza por terra, mar e ar: desde a Ulloa, segue o percurso do río Ulla e chega até enlamar a ría de Arousa. Se a pasta celulosa é necesaria para producir papel, é certo tamén que o papel pode ser importado no mercado exterior, da mesma forma e maneira, ás veces irresponsabelmente, que se fai cunha gran cantidade de bens. Soubemos na pandemia que a dependencia industrial do exterior era unha forte fonte de debilidade económica, industrial, e por tanto causa de graves problemas sociais en caso de desabastecemento. Comprobamos de maneira fidedigna que a dependencia do exterior no caso esencial dos fármacos dábase exactamente co mesmo circuíto comezando sempre en Asia. A deslocalización industrial axudada polas políticas estatais ultra-liberais logrou o grande éxito de gran negocio para as compañías, baixos salarios para os traballadores e gran perigo de colapso social por escaseza radical de bens tan simples como máscaras ou esenciais como antibióticos, antivirais ou para tratamentos oncolóxicos. Con Altri, a acción proactiva por parte da Xunta, personalizada primeiro en Feixoo e agora Rueda, transparenta o feito de que foi interese buscado En plena pandemia, a industria agrogandeira, a pesqueira e a transformadora industrial destes bens alimenticios, xunto coas farmacéuticas existentes, pasaron a ser consideradas, polo menos no ideario colectivo, industrias esenciais, prioritarias, estratéxicas e calquer outro adxectivo que faga referencia ao seu carácter social de imprescindíbel. Desde a Xunta a Portugal O Goberno galego, ante os fondos Next Generation, non foi quen de elaborar un documento de preferencias para negociar un uso racional e enchoupador (pola vía do investimento produtivo) do tecido industrial existente e o reparto de fondos en mans do Estado semella un reparto a rapañota. En cambio, con Altri, a acción positiva, proactiva, por parte da Xunta, personalizada primeiro en Feixoo e agora Rueda, transparenta o feito de que foi interese buscado, desde a Xunta a Portugal. De tal maneira que a Xunta participa directamente ou por interpostos (Impulsa) nunhas primeiras xuntanzas con representantes de Altri máis Abanca, Reganosa e Sogama para asinar en 2021 un primeiro Memorando de Entendemento para fabricar fibra lyocell. Nesas primeiras reunións quixeron amosar que Inditex podía ter interese no "entendemento" mais non entendeu nen atendeu. (É de "inxenuos" crer que tal empresa de capital financeiro ten interese en fibras). O certo é que de forma moi temperá ficou o proxecto aparcado, visto que non entraba nen con calzador nos PERT's dos Netx Generation, e Altri só viría a Galiza con 400 millóns públicos regalados. 2022 pasou seguramente durmindo en espera de mellores expectativas, aínda que a Xunta fai a declaración de interese xeral para Altri sen dar a coñecer o proxecto. No 2023 a ministra de Economía Nadia Calviño pasa a dirixir o Banco Europeo de Investimentos (BEI) e semella que o proxecto revive. Pero agora Altri non vai fabricar fibra, senón pasta de celulosa. Non imos poñer o acento no famoso lobby que acompañou este proxecto, nen do cambio da xestión da imaxe e propaganda nen dos primeiros contratos de persoal para influír tanto nas redes sociais como nos medios de comunicación clásicos, pero si do rol activo da Xunta en apoiar de forma insistente, teimuda, a Altri de celulosa na Ulloa, en beneficio único da compañía portuguesa.