O Bloque Nacionalista Galego (BNG) anunciou esta quinta feira que denunciará o Goberno local da Coruña, dirixido pola socialista Inés Rei, ante a Xunta Electoral de zona por convocar a ‘Cea do Deporte’ o próximo 5 de maio, “apenas uns días antes do comezo da campaña das eleccións municipais”.
Segundo precisa a formación política, o pasado 4 de abril publicouse no Boletín Oficial do Estado (BOE) o Decreto de convocatoria das eleccións municipais.
A partir dese momento, e segundo a Lei electoral vixente, engade, “non se poden producir actos de propaganda institucional”.
“Xogo limpo”
Para o portavoz do BNG no Concello herculino e candidato á Alcaldía, Francisco Jorquera, trátase dun “intento por parte do Goberno local de usar recursos públicos, institucionais, para darlle publicidade ao labor do propio Goberno local, o cal contravén por completo o estabelecido na Lei electoral vixente”.
O candidato nacionalista reclama “xogo limpo” na campaña das eleccións municipais que principiará e que “non se usen recursos públicos, recursos de todos os cidadáns e cidadás, con fins partidistas e electorais”.
