Noboa: o émulo de Bukele tenta exercer o poder á marxe da lei

A recente detención do ex vicepresidente do Ecuador no goberno de Correa, Jorge Glas, saltando a legalidade internacional e violando a territorialidade soberana da embaixada mexicana en Quito, non é máis ca un aviso de que non só os países poderosos do primeiro mundo poden secuestrar persoas e violar os acordos e leis internacionais. O balbordo creado polo rapto de Jorge Glas pasará como unha arroutada do presidente Daniel Noboa, que decidiu tomar a xustiza pola man nun país no que impera o narcotráfico. Ecuador é un país cunha historia inzada de delincuentes, Febres-Cordero, Bucaram, etc., na Presidencia e no goberno. Cunha poboación amarrada á pobreza, coa delincuencia e a emigración como saída natural e como proxecto de vida para saír de tan tráxico sino. A situación chegou a ser tan crítica para a poboación que na década dos 90 a maior parte dos ecuatorianos non podía nin mercar un xarope para a tose e as farmacias subministraban e vendían as doses a culleradas dende o mostrador. O Estado español nutriu o seu exército profesional de salvadoreños e ecuatorianos, os dous países máis pobres do continente, e a inmigración ecuatoriana foi a máis numerosa en España, durante varios anos, malia ser un país cunha escasa poboación. Dolarización A presidencia de Jamil Mahuad dolarizou o país por mor da grave crise inflacionaria en 2000. A dolarización non era máis que a substitución do azucre ecuatoriano polo dólar estadounidense como moeda de curso legal, imposibilitando a emisión de diñeiro inorgánico por parte do Estado. A dolarización "solucionou" a crise inflacionaria e financeira de 1999 pero, xa en 2001, o nivel de incremento de prezos alcanzaba 100% interanual, unha proba máis de que as dolarizacións non son unha panacea. A dolarización afectou a economía ecuatoriana profundamente e non solucionou os seus problemas estruturais, pois fíxoo dependente do prezo do petróleo que exporta e sobre o que non ten ningún control nos prezos dos mercados internacionais, xa que dependen de factores exóxenos. A dolarización foi unha decisión tomada polas elites para o seu propio beneficio de costas ás clases populares, que sufriron, sofren, as consecuencias do amaño das contas macroeconómicas e a fame da microeconomía cotiá. Ecuador ficou sen soberanía monetaria e impediu instaurar políticas económicas axeitadas á realidade, obrigando o país a financiarse mediante endebedamento externo e contraendo unha débeda impagábel que tivo que renegociar en 2020, renegociación que o levou ao nivel de risco-país máis elevado de Latinoamérica nos mercados internacionais, seguido doutro estado dolarizado, O Salvador. Noboa está disposto a ser "o home forte" do Ecuador militarizando a rúa e saltando a legalidade internacional para gañar popularidade e a reelección Daniel Noboa, nado en Miami e fillo da principal fortuna do país, quere demostrar ante a opinión pública que está disposto a ser "o home forte" do Ecuador militarizando a rúa e saltando a legalidade internacional, e así lograr unha popularidade tipo Bukele que lle asegure unha reelección cómoda. Seguranza ou liberdade O secuestrado ex vicepresidente Jorge Glas, arestora no hospital por sobredose de medicamentos, estaba condenado por corrupción cando se asilou na embaixada mexicana en decembro de 2023. O secuestro e a militarización da rúa como consecuencia da guerra contra as bandas de narcotráfico rendeulle a Noboa unha popularidade de entre 70% e 80%. Noboa sabe que todas estas arroutadas son aplaudidas no seu país. De feito, os discursos populistas de Milei e as imaxes das ringleiras de presos coa cabeza rapada e co torso espido do Salvador causan admiración entre millóns de latinoamericanos que devecen pola seguranza como opción primeira ante a liberdade. Pero todo este espectáculo e todos estes réditos ante un público entregado teñen data de caducidade. O día a día dos ecuatorianos e os exemplos de gobernos que, sen chegaren a estrangular nin a lei nin as liberdades, conseguen mellorar a vida dos cidadáns son o mellor antídoto contra os "homes fortes". A apócema contra os Noboa tería a Manuel López Obrador como exemplo; nun país asolado pola violencia e a corrupción logrou manter a seguranza sen anular as liberdades e o incremento de dereitos sociais xunto á redución da pobreza, sen esquecer que por vez primeira México é o primeiro socio comercial de Estados Unidos, desbancando a China.