A pobreza e a sanidade pública, principais preocupacións da poboación da UE de cara aos comicios de xuño

Malia o foco posto nas institucións da Unión Europea (UE) nas persoas migrantes, ás que o pacto migratorio aprobado a pasada semana dificulta aínda máis o acceso, a principal preocupación para a poboación do bloque comunitario de cara aos comicios de xuño ao Parlamento da UE é a pobreza, desvelou a cuarta feira o Eurobarómetro, un instrumento demoscópico da UE. Un terzo das persoas que participaron na enquisa, efectuada nos 27 Estados membros, apuntaron directamente á loita contra a pobreza e a exclusión social como o eixo capital das temáticas que se deberían abordar na campaña electoral. O certo é que segundo os datos publicados o pasado ano por Eurostat, 95,3 millóns de persoas na UE estaban en risco de pobreza ou exclusión social en 2022, até 21,6% das e dos seus habitantes. De feito, o Estado español era o cuarto nesa listaxe despois de Romanía (34,4%), Bulgaria (32,2%) e Grecia (26,3%), con 26%, unha cifra que en 2023 se elevou a 26,5% da poboación estatal. Porcentaxe de poboación en risco de pobreza e exclusión en base á taxa Arope (da Galiza e do Estado de 2023 e do resto de 2022). No caso da Galiza as estatísticas indican tamén un aumento da pobreza e a exclusión social, desde o 23,6% de 2022 até 25,5% o pasado exercicio, un número que após varias oscilacións segue a ser máis alto que o de 2008, cando se fixou en 25,1%. A nivel da UE, mulleres, persoas entre 18 e 24 anos, cun baixo nivel educativo ou desempregadas tiñan de media maiores probabilidades de estar en risco de pobreza que outros grupos, sentenciou Eurostat. Case dous terzos das persoas maiores de idade desempregadas padecen pobreza, amais dunha quinta parte das xubiladas. Así e todo, e tendo en conta que a taxa de desemprego no bloque é de 6%, un importante número de persoas sofre esta situación a pesar de contar cun traballo. A Rede Europea de Loita contra a Pobreza e a Exclusión Social no Estado español confirmou que isto afecta a unha de cada tres persoas con emprego, algo que vinculou coa suba do prezo da vivenda, a fenda de xénero e a falta de apoio ás familias con menores de idade. Case 10% da poboación sobrevive con ingresos inferiores a 560 euros mensuais, e aproximadamente a metade tivo dificultades para chegar a fin de mes. Logo da pobreza, entre as catro respostas como máximo que cada participante na enquisa podía brindar, aparece o apoio á sanidade pública (32%) e o apoio á economía e á creación de novos traballos (31%) como segunda e terceira prioridade, coa preocupación pola economía ligada presumibelmente coa pobreza. O 10% máis rico da poboación acumula até 53,8% da riqueza No tocante á sanidade pública, estes resultados reflicten as privatizacións e externalizacións dos servizos públicos “directamente relacionadas con decisións políticas animadas pola Comisión Europea”, o Executivo da UE, concluíu un informe do Observatorio da Europa Corporativa, que fai fincapé en que “a privatización do sistema sanitario europeo tivo efectos mortais”, incidindo en que a pandemia de Covid-19 “puxo en evidencia” esta cuestión. Nese sentido, un estudo científico da Universidade de Duke publicado hai dúas semanas e que investigou os efectos das reformas sanitarias en 36 países europeos entre 1989 e 2019 resolveu que as privatizacións están asociadas “con taxas máis altas de mala saúde subxectiva e necesidades de saúde insatisfeitas varios anos despois da aprobación das reformas”, cuxos “efectos son máis fortes para as persoas nos niveis máis baixos de ingresos e educación, o que resulta en maiores desigualdades socioeconómicas”. Migración e ultradereita O referente á migración e ao asilo ocupa nesta listaxe a sétima praza (24%), detrás da defensa e seguridade na UE (31%), a acción contra o quecemento global (27%) e o futuro do continente (26%), confirmando a posición de persoas expertas que subliñaban tras a aprobación do novo pacto migratorio que estaba moi lonxe de ser unha das principais preocupacións na poboación do bloque. O Parlamento da UE aproba un pacto migratorio que ignora as 30.000 mortes no Mediterráneo desde 2014 Esta norma, apoiada sobre todo por forzas conservadoras, socialdemócratas e liberais, que a xustificaron como unha medida para combater a alza da extrema dereita -mais aplicando as súas políticas neste ámbito-, “corre o risco de empoderala”, subliña o experto Daniel Trilling no xornal The Guardian, detallando que non ofrece solucións reais ao centrarse en disuadir as migracións, pois a maioría das persoas que se desprazan cara a Europa a través do mar Mediterráneo ou desde a costa africana ás Canarias o fan pola falta de opcións seguras e legais e fuxindo da violencia e da persecución. Incluso en Italia e Hungría, con Gobernos de ultradereita que insisten en que a migración é un dos problemas chave, a economía foi marcada pola cidadanía como a prioridade fundamental. Carreira armamentística Asemade, noutra das cuestións da sondaxe, ao preguntar sobre cales son os valores que o Parlamento da UE debería dar prioridade na vindeira lexislatura, que se estenderá até 2029, 47% das persoas indicaron que a paz, 14 puntos por riba da democracia, que ocupa o segundo posto. Este díxito contrasta coa política actual do bloque comunitario, que se sumou á carreira armamentística impulsada pola Organización do Tratado do Atlántico Norte (OTAN), a alianza militar controlada polos Estados Unidos á que pertence a meirande parte dos Estados membros da UE, e que Bruxelas xustificou na guerra en Ucraína a pesar do papel chave dos seus dous países con máis poboación e coas maiores economías, Alemaña e Francia, á hora de imposibilitar o cumprimento dos acordos de Minsk, cuxo fracaso foi determinante para que dera inicio á invasión rusa. A guerra en Ucraína alcanza o seu décimo aniversario sen indicios de que a paz sexa posíbel a curto prazo Con todo, en 14 Estados da UE a defensa e a seguridade foi a primeira resposta ao ser inquirida a poboación sobre os aspectos nos que o bloque comunitario debería centrarse para reforzar a súa posición no mundo. Ademais, 60% das persoas remarcaron que están interesadas nas eleccións ao lexislativo da UE, e 81% sostén que votar é aínda máis importante pola situación internacional, marcada especialmente nos últimos meses polo xenocidio en Gaza perpetrado por Israel, que ten na UE -que non pediu sequera un alto o fogo- un dos seus aliados canda os Estados Unidos, do que case 60% da UE ten unha visión negativa. 170.000 persoas subsisten na Galiza Na Galiza, máis alá do risco de pobreza e exclusión social, arredor de 170.000 persoas padecen privación material e social severa, e non poden permitirse sufragar unha conexión a internet, reunirse para comer ou tomar algo con persoas achegadas nin unha vez ao mes ou substituír a roupa que se estraga. As mulleres seguen a sufrir con máis probabilidade esta situación que os homes, con case 100.000 delas nesta situación, que padecen 7% dos menores de idade.